White इस आजादी खात्तर गळगे निरे गात दोस्तो
मत ना होण दियो थाम दिन की रात दोस्तो
लट्ठ खाये थे निरै गात पै छात्ती पै गौळी थी
मरण मारण नै त्यार खड़ी शहीदां टोळी थी
बौळी थी कत्ती बौळां की बारात दोस्तो
काच्चे काच्चे छोरे झूलगे हँसते हँसते फाँस्सी
हाड जळा कैं म्हारे खात्तर ज्योत फेर या चास्सी
हाँस्सी ना हो मौत तै करणी मुलाकात दोस्तो
मांयां नै अपणे बेट्टे सब हँस हँस वार दिये थे
मंगल सुत्र बहुआं नै भी देस पै हार दिये थे
मार दिये थे उन भाणा नै जजबात दोस्तो
आजाद वै करगे आजादी की रुखाळ करैगा कुण
सारे हो रे मगन मस्त इसकी संभाळ करैगा कुण
टाळ करैगा कुण मिल रही सौगात दोस्तो
बलिदान वै उणके न्यूंए थाम बेकार जाणद्यो ना
निरे फिरंगी आज भी हांड्डै फायदा ठाणद्यो ना
आणद्यो ना बैरी बीच म्ह, मारो लात दोस्तो
©Rajbir Khorda
#happy_independence_day
