"श्रीवल्लभा दत्तराया समर्था मनापासुनी मी तुला वंदितो सेवा घडावी तुझ्या पावलांची असा भाव भोळा मनी दाटतो डोळ्यांपुढे साजिरी ती दिसावी मला दत्त मूर्ती सदा सर्वदा मूर्ती तुझी दिव्य पाहून माझ्या मना शांतता खूप लाभो सदा किर्ती जिच्या थोर पातिव्रत्याची त्रिखंडात साऱ्या असे गाजली आले त्रिमूर्ती यतीवेषधारी परीक्षा तपाची तिच्या पाहिली केले तपाच्या बळे बाळ त्यांना यथायोग्य भिक्षा तिने घातली एकत्र होऊन शक्ती तिघांची तुझ्या दिव्य रूपात साकारली पायी खडावा जटाभार माथी शिरे तीन बाहू सहा शोभती कांती तुझी दिव्य वात्सल्य मूर्ती तुझी पाहता भक्त आनंदती संकेतमात्रे तुझ्या विश्व चाले त्रिखंडात सत्ता तुझी चालते सांभाळिशी तू तुझ्या साधकांना जशी लेकरा माय सांभाळते लागो मनाला तुझा ध्यास ऐसा तुझे नाम घ्यावे सदा सर्वदा राहो तुझा हात डोईवरी या घडो चांगले वा असो आपदा लागो न वारा अहंकार रूपी तुझ्या नाममात्रे कधीही मना राहो मनी नेहमी प्रेम भक्ती तुला दत्तराया असे प्रार्थना ©जितू "