"ગઝલ : રંક ઊંઘમાં પણ જાગતું શમણું હશે, સત્ય ભાસે તે છતાં ભ્રમણું હશે, મુખ પર જેના સદા હો સ્મિત પણ, હર્ષ કરતાં દર્દ એ બમણું હશે, નાથ દુઃખો દૂર કરવા રાંક ના, જે કરે ચકચૂર એ દરણું હશે ? જીવવાની હોય ઈચ્છા શોધ કર, સિંધુ મધ્યે ક્યાંક તો તરણું હશે, રાત પડતાં હોય અંધારું બધે, બારણું ખુલશે એ ઉગમણું હશે, દેખ આંખો ધ્યાન આપી રાંકની, શુષ્ક વહેતું શાંત પણ ઝરણું હશે, ટંક ભોજન કાજ પળપળ વેઠવું, ભૂખ કાજે દોડતું હરણું હશે, રાહ ચાલી ધ્યેયને એ પામશે, રંક સમ જેનું વલણ નમણું હશે, હો ખુશી તો ક્યાં કરું છું "બંદગી" ! દર્દ આવે તો પ્રભુ શરણું હશે - તીર્થ સોની "બંદગી" રાજકોટ"