पर्यावरण - नई हरयाणवी रागनी
तूं कितना ए जतन लगाले बन्दे वो पल में प्रलय करता है
तूं भाज भाज कै थक लेगा, वो एक पग में योजन भरता है
तनै पेड़ अर पौधे काट काट कै, जंगल नदी उजाड़ दिए
पर्वत घाटी काट काट कै, खनिज और पत्थर काढ़ लिए
उनै बाढ़ के पंजे गाड़ दिए, इब क्यूं ज्यान बचाए फिरता है
तनै सारी ए धरती बंजर करदी, मार कै खाद दवाई
खान पान सब जहरी कर दिया, जहरी ए हवा बणाई
तनै अपनी शामत आप बुलाई, वो तौल तौल कै धरता है
धरती थोथी करकै नै तनै, सारा पाणी खींच लिया
पीवण नै भी छोड़या ना तनै, आंगण बाड़ी सींच लिया
उनै दया का पंजा भींच लिया इब, बूंद बूंद नै मरता है
कई कई मंजिल भवन बणा लिए, कितै बारा कितै ठारा
पहाड़ दरकगे नदी उफणगी, तेरा कुछ ना चाल्या चारा
कदे सुनामी कदे हल्लण आरहया, फिर कुदरत से क्यूं डरता है
गुरु पालेराम नै पकड़ आंगली कथना रचना सिखा दिया
के आच्छा के बुरा जगत में शीशे की ज्यूं दिखा दिया
उनै कड़वा मीठा चखा दिया वो जीवन के दुख हरता है
कॉपीराइट©️आनन्द कुमार आशोधिया 2024-25
©Anand Kumar Ashodhiya
Continue with Social Accounts
Facebook Googleor already have account Login Here