White ਗ਼ਜ਼ਲ ਖਾਮੋਸ਼ੀ ਵਿਚ ਸ਼ੋਰ ਬੜੇ ਨੇ। ਅੰਦਰ ਖ਼ਾਤੇ ਚੋਰ ਬੜੇ ਨੇ । ਖ਼ੁਦ 'ਤੇ ਇੰਝ ਗ਼ਰੂਰ ਨਾ ਕਰ ਤੂੰ, ਤੇਰੇ ਵਰਗੇ ਹੋਰ ਬੜੇ ਨੇ। ਸੁੱਕੇ ਲੰਘਣੇ ਸਾਡੇ ਸਿਰ ਤੋਂ, ਬੱਦਲ ਜੋ ਘਨਘੋਰ ਬੜੇ ਨੇ। ਪੈਰ ਉਨ੍ਹਾਂ ਦੇ ਕਿਸ ਕੰਮ ਦੇ, ਜੋ ਜ਼ਿਹਨ ਤੋਂ ਹੀ ਕਮਜ਼ੋਰ ਬੜੇ ਨੇ। ਜੰਗਲ ਨਾਲੋਂ ਸ਼ਹਿਰ 'ਚ ਅੱਜਕੱਲ੍ਹ, ਥਾਂ-ਥਾਂ ਆਦਮਖ਼ੋਰ ਬੜੇ ਨੇ। ਬਿਸ਼ੰਬਰ ਅਵਾਂਖੀਆ, 9781825255 ©Bishamber Awankhia

Bishamber Awankhia

White ਫ਼ਰਿਸ਼ਤਾ ਜਦੋਂ ਮੈਂ ਬਹੁਤ ਉਦਾਸ ਸੀ, ਕੋਈ ਮਰਜ਼ ਮੈਨੂੰ ਅੰਦਰੋਂ ਖਾ ਰਿਹਾ ਸੀ, ਰੋ ਰਿਹਾ ਸਾਂ, ਵਿਲਕ ਰਿਹਾ ਸਾਂ, ਤੜਫ਼ ਰਿਹਾ ਸਾਂ ਤੇ ਮੌਤ ਬਿਲਕੁੱਲ ਦਹਿਲੀਜ਼ 'ਤੇ, ਹਰ ਪਲ ਔਖਾ, ਹਨੇਰੇ ਵੱਲ ਨੂੰ ਖਿੱਚ ਰਿਹਾ ਸੀ, ਚਾਨਣ ਤਾਂ ਕਿਤੇ ਹੈ ਹੀ ਨਹੀਂ ਸੀ, ਸੁਫ਼ਨੇ ਸਾਰੇ ਸੁਆਹ ਸਨ, ਅੱਖਾਂ ਚੋਂ ਹੰਝੂ ਵੀ ਮੁੱਕ ਗਏ ਸਨ, ਪਰ ਇੱਕ ਦਿਨ ਮੇਰੀ ਹਯਾਤ ਤੋਂ ਛੁਟਕਾਰੇ ਦੀ ਫ਼ਰਿਆਦ ਕਿਸੇ ਅਸੀਸ ਵਿੱਚ ਬਦਲ ਗਈ ਤੇ ਕਿਸੇ ਫ਼ਰਿਸ਼ਤੇ ਨੇ ਬਾਂਹ ਫੜੀ, ਮਰਜ਼ ਤਾਂ ਕਿਤੇ ਖੰਬ ਲਾ ਕੇ ਉੱਡ ਗਿਆ, ਬੁੱਲ੍ਹਾ 'ਚ ਮੁੜ ਹਾਸੇ ਵਾਪਸ ਆਏ, ਨਵੇਂ ਚਾਹਵਾਂ ਨੇ ਜਨਮ ਲਿਆ, ਪਰ ਜ਼ਿਆਦਾ ਦਿਨ ਨਹੀਂ, ਘਰੋਂ ਨਿਕਲਦੇ ਹੀ ਕਈ ਨਜ਼ਰਾਂ ਨੇ ਮੈਨੂੰ ਨਜ਼ਰ ਲਗਾਉਣਾ ਆਪਣਾ ਸ਼ੌਕ ਸਮਝਿਆ ਤੇ ਫ਼ਰਿਸ਼ਤੇ ਨੂੰ ਵੀ ਨਜ਼ਰ ਲੱਗੀ ਉਨ੍ਹਾਂ ਲੋਕਾਂ ਦੀ ਜਿਨ੍ਹਾਂ ਕਦੇ ਹਾਲ ਵੀ ਨਹੀਂ ਸੀ ਪੁੱਛਿਆ ਤੇ ਹੁਣ ਸਿਰਫ਼ ਨਜ਼ਰਾਂ ਲਗਾਉਂਦੇ ਨੇ ਜਦੋਂ ਵੀ ਕੋਈ ਅਸੀਸ ਭਰਿਆ ਹੱਥ ਉਸ ਫ਼ਰਿਸ਼ਤੇ ਦਾ ਮੇਰੇ ਸਿਰ 'ਤੇ ਆਉਂਦਾ ਹੈ ਤਾਂ ਅਸੀਂ ਦੋਵੇਂ ਨਜ਼ਰਾ ਜਾਨੇਂ ਆਂ ਮੈਂ ਤੇ ਉਹ ਫ਼ਰਿਸ਼ਤਾ ਮੈਂ ਤੇ ਉਹ ਫ਼ਰਿਸ਼ਤਾ ਬਿਸ਼ੰਬਰ ਅਵਾਂਖੀਆ ©Bishamber Awankhia

Bishamber Awankhia

ਕਵਿਤਾ ਅੜਿਆ, ਏਦਾਂ ਨਹੀਂ ਹੁੰਦਾ ਏਥੇ ਕੋਈ ਕਿਸੇ ਦਾ ਗੁਲਾਮ ਨਹੀਂ ਹੈ ਹਰ ਕੋਈ ਅਜ਼ਾਦ ਹੈ ਆਪਣਾ ਫੈਸਲਾ ਲੈਣ ਨੂੰ, ਆਪਣੇ ਸੁਫ਼ਨੇ ਸਜਾਉਣ ਨੂੰ, ਆਪਣੇ ਚਾਅ ਪੂਰੇ ਕਰਨ ਨੂੰ ਅਜ਼ਾਦੀ ਨਾਲ ਜਿਉਣ ਨੂੰ, ਹਰ ਕੋਈ ਅਜ਼ਾਦ ਹੈ ਤੇ ਤੂੰ ਉਨ੍ਹਾਂ ਨੂੰ ਆਪਣਾ ਗੁਲਾਮ ਸਮਝਦਾ ਏਂ ਪਤੈ , ਗੁਲਾਮ ਹਮੇਸ਼ਾਂ ਗੁਲਾਮ ਨਹੀਂ ਰਹਿੰਦੇ ਉਨ੍ਹਾਂ ਵਿੱਚ ਕ੍ਰਾਂਤੀ ਦੀ ਭਾਵਨਾ ਆ ਜਾਂਦੀ ਹੈ ਤੇ ਉਹ ਅਜ਼ਾਦ ਹੋ ਜਾਂਦੇ ਨੇ ਤੂੰ ਉਨ੍ਹਾਂ ਨੂੰ ਆਪਣਾ ਸਮਝਿਆ ਕਰ, ਉਹ ਕੀ ਸਮਝਦੇ ਨੇ ਉਹ ਸੋਚਣ ਲਈ ਅਜ਼ਾਦ ਨੇ ਬੱਸ ਏਨਾਂ ਕੁ ਕੰਮ ਹੈ ਕਰਨ ਨੂੰ ਬਿਸ਼ੰਬਰ ਅਵਾਂਖੀਆ ©Bishamber Awankhia

Bishamber Awankhia